1.Auf auf ihr Bürger - staunt ins Gwehr - d’Franzose rucket an
sie rucket scho mit Sack und Pack vor’s Rathaustürle na.
2.Auf auf schnell machet - Törle zua - und schiabet Riegel vor
und batschet au reacht Mist dra na noch ka dr Feind net vor.
3.Was Weibsleut send die - hocket jetzt – uff d’Rathaus-Mischde na
und statt em Grschrei und Lumpagschwätz bett jede für Ihr’n Ma.
4.D´Fuierwehr dend - schnell herbei – ond siedigs Wasserr nei
und dend au reacht viel Welschkornbrei und große Knöpfle nei.
5.Und fliagt so a - Kugel grad – oim in sei Goscha nei
no muß er schier versticke dran des ka net anders sei.
6.Ond fliagt so a - Kugel jetzt – uff onser Städle ra
no schreiet Weiber fuirio und schiffet früber na.
7.Dr Bittel hot sich - au dreigmischt – der hot de gröscht Kurasch
weil er an großa Säbel hot, der hängt ihm an seim Arsch.
8.Des isch a Ma so - geit’s net viel – der isch bei Gott so keck
der reißt em Deifel wenn er will de Schwanz vom Fiedle weg.
9.Wenn oiner a stoinigs - Äckerle hot – ond au an stompfe Pfluag
ond no a reidigs Weib dahoim no hot er z’kratzt gnuag.
10.Mei Heanerstall isch - oba leer – und onda isch nix drin
no scheißt mr au koi Hahn in Korb, verreckt mr au koi Henn.
11.Ond vor em Haus ind - henterm Haus – do stoht a Sack voll Biere
komm Mädle setz de her zu mir no wollet mer’s probiere.
12.Dr Karle hot denkt – ‘s dät em nix – jetzt hot’s em ebbes dau
jetzt zahlt er halt die fuffzig Mark wie unser oiner au.
13.Wenn mi mei Muater - schempfa duat – no wird i rabiat
no gang i en de Garte na ond scheiß’re in Salat.
14.Wenn mi mei Vadder - ärgre duat – no ben i sehr erbost
no gang i en de Keller na ond soich’ em de Most.
15.Pfarrers Magd hot a - Kendle kriagt – jetzt woiß me net von wem
dr Schultes hot an große Hund jetzt schiabt mer’s halt uff den.
16.Pfarrers Magd hot - selber gsait – se het’s soweit do henda
ond wenn des Büschel Hoor net wär no det mer’s gar net fenda.
17.Ond dronda en dr - Webergass – do wohnt der Gerber keck
der gerbt sei Weib scho vierzig Johr und brengt die Hoor it weg.